సూదికోసం సోదికెడుతున్నావా ? ? ?

 

ఏ దేశమేగినా, ఎందుకాలిడినా

అదే మట్టి కాలికంటుతున్నప్పడు

ఆ మట్టిలోంచి పుట్టిన మనిషి

కంటికోరకంగా కనిపిస్తే ఎట్లా !

 

మానవత్వం పీక పిసికి

స్వార్థపు సంచుల్లో కుక్కి చెప్పే

మత ఇతిహాసాలు, ఘనతలు

కులపురాణాలు, వర్గ చరితలు

పరిశుద్ధత, పాతివ్రత్యాల వల్లెవేతలు

ఇక ఆపు...

ఆ కారుకూతలు ఇంకా ఎందుకు

ఆ రంగుటద్దాలు తీసిపారేయ్

పో..పోయి నీ డిఎన్ ఏ చూసుకో

 

చరిత్రలోంచి పొడుచుకొచ్చిన

కొమ్ములతో, గిట్టలతో

తల్లి భూమిని కుళ్ళబొడిచి

లంకె బిందెలు తీయొద్దు

వారసత్వ హక్కులు చాటొద్దు

....

ఓ రాక్షసుడి రాజ్యంలో

కొద్దికాలంపాటూ ఒంటరిగా

కోటకు దూరంగా ఉంటేనే...

అగ్ని పరీక్షలు అవసరమనిపిస్తే....

 

ఏ దేశ చరిత్ర చూసినా

పరపీడన పరాయణత్వం అయినప్పుడు

శతాబ్దాల పరాయిపాలనలో

నలిగిన తాతముత్తాతలకు, మనకు

ఎన్ని శల్య పరీక్షలు చేయించాలో,

ఎన్ని డిఎన్ ఏలు తీయించాలో

లెక్కగట్టకుండా

ఇంకా

ఆ కూతలెందుకు, రాతలెందుకు

ఇంకా ఆ రంగుటద్దాలెందుకు,

తీసెయ్....

  

పెత్తందార్ల కాళ్ళకింద

పాశవికంగా నలిగిన

ఏ తోలుసంచీనుంచి జారి పడిన

ఏ జీవపు చుక్క

ఏ నెత్తుటి మొక్కయి

ఎంత పెద్ద మానయిపోయిందో

ఎన్నేసి  ఊడలు దింపిందో

ఏ ఎఱుకల సానో చెప్పాలి...

 

సూదీ వద్దు సోదీ వద్దు

సోదికత్తెలను కదిలించకు

జాతక చక్రాలన్నీ తిరగబడతాయి

 

రాక్షసరూప నరుడివై

చరిత్రలో చీటికీమాటికీ తలదూర్చొద్దు

చరిత్రలు మార్చొద్దు

....

ఏ నెత్తురు ఎటు పారుతోందో

సూర్యచంద్రులే చూడలేరు

అన్ని మొక్కల్లో పారే నెత్తుటి చుక్కలు

ఒక్కటే అనుకో

 

ఏ మొక్క అన్నది చూడకు

ఓ గుక్కెడు నీళ్ళుపోస్తుండు చాలు

కొత్త చిగుళ్లు తొడుగుతుంది,

కులమతాల కుళ్ళు,

వర్గ, ప్రాంతాల చీడలు లేని

కల్పవృక్షాల తోటవుతుంది

మానవత్వంతో మాగబెట్టి

రసాలూరే ఫలాలను

రాశులుగా నింపుతుంది

 

-  చినవ్యాసుడు  మాఊరు